ជិវិតនិងការតស៊ូរបស់លោក ឃឹម​ ផុន


អត្តបទដកស្រង់ចេញពីការសែតកម្ពុជាថ្មី៖
លោក ​ឃឹម ​ផុន ​កើត​នៅ​ឆ្នាំ​១៩៧៦​ នៅ​ភូមិ​ឧកញ៉ាទេព ឃុំត្រពាំងគង ស្រុកសំរោងទង​ ​ខេត្តកំពង់ស្ពឺ​ ជា​ក្មេង​កំព្រាម្តាយ​តាំងពី​អាយុ​២​ឆ្នាំ​ព្រោះម្តាយ​គាត់​បាន​ទទួល​អនិច្ចកម្ម​ក្នុង​របបកម្ពុជា​ប្រជាធិបតេយ្យ។
រស់នៅជាមួយនឹង​ជីដូន​មេម៉ាយ​លោក​ត្រូវ​ឆ្លងកាត់​បទពិសោធន៍​ដ៏​សែន​លំបាក​លោក​ ធ្វើ​ការងារ​ស្ទើរតែ​គ្រប់មុខ​ដោយ​មិន​ប្រកាន់​នោះ​ទេ​ដូចជា​ការងារ​ ធ្វើស្រែ​ចម្ការ​ឡើងត្នោត​រកស៊ី​រែក​ដី​ជាដើម។ មិនតែប៉ុណ្ណោះ​ជីដូន​លោក​ក៏​ធ្វើ​នំ​រួច​លោក​ដើរ​លក់​នំ​ក៏​មាន។ លុយ​ដែល​រកបាន​ត្រឹមតែ​ទិញ​បាន​សៀវភៅ​ទិញ​សម្លៀកបំពាក់​និង​ផ្គត់ផ្គង់​ការ​ ហូបចុក​ប្រចាំថ្ងៃ​តែ​ប៉ុណ្ណឹង។ មែន​ទែន​ទៅ​លោក​បាន​រស់នៅ​ជាមួយនឹង​ជីដូន​អស់​រយៈពេល​១៥​ឆ្នាំ​ស្ថានភាព​ ក្រីក្រ​លំបាក​បែបនេះ​គឺជា​អនុស្សាវរីយ៍​ជូរចត់​ដែល​លោក​មិនអាច​បំភ្លេច​បាន ​នោះ​ទេ។
ជា ​ធម្មតា​ការ​លំបាក​តែ​ផ្លូវកាយ​វា​មិន​ថ្វី​ទេ​តែ​អ្វី​ដែល​សំខាន់​លោក​ក៏​ លំបាក​ផ្លូវ​អារម្មណ៍​ផង​ដែរ។ លោក​បាន​ប្រាប់​ថា​ ”​ពេលខ្លះ​ខ្ញុំ​មាន​អារម្មណ៍​ក្តុកក្តួល​អង្គុយ​យំ​ព្រោះ​អី​រស់នៅ​បែក​ពី​ ឪពុក​ធ្វើ​ឲ្យ​ខ្ញុំ​គ្មាន​ភាព​កក់ក្តៅ​ដូច​ក្មេង​ដទៃទៀត។ គេ​មាន​ប៉ា​ម៉ាក់​រស់នៅ​ជុំគ្នា​តែ​ចង្រៃ​អី​តែ​ខ្ញុំ​គ្មាន​ភាព​កក់ក្តៅ​ ដូចជា​អ្នកដទៃ​ទាល់តែសោះ​”​។
ក្រោយមក ​ឪពុក​លោក​ក៏​មក​សុំ​លោក​ពី​ជីដូន​ទៅ​នៅ​ជាមួយ​កាលនោះ​លោក​ទើបតែ​រៀន​បាន​ ថ្នាក់​ទី​៩​នោះ​ទេ​ហើយក៏​បាន​ប្ដូរ​ទៅ​រស់នៅ​ជាមួយនឹង​ឪពុក​និង​ម្តាយចុង។ ធាតុ​ពិត​ទៅ​ជីដូន​លោក​បាន​ហាម​លោក​កុំ​ឲ្យ​ទៅ​នៅ​ភ្នំពេញ​ធ្វើ​អ្វី​ព្រោះ​ រស់នៅ​ជាមួយ​ម្តាយចុង​មិន​ស្រួល​ដូច​ម្តាយ​បង្កើត​នោះ​ទេ​តែ​លោក​នៅតែ​ជម្នះ ​ត្រូវ​តែ​ទៅ​ឲ្យ​ទាល់​តែ​បាន​ព្រោះ​ជា​សេចក្តី​ត្រូវ​កា​រហើយ​ណាមួយ​លោក​ ខ្វះ​ភាព​កក់ក្តៅ​អស់​រយៈពេល​យូរណាស់​មក​ហើយ។
គួរ ​រំលឹក​ផង​ដែរ​ថា​មុន​ពេល​លោក​ទៅ​រស់នៅ​ភ្នំពេញ​ជីតា​របស់​លោក​ក៏បាន​ត្រលប់ ​មក​រស់នៅ​ជាមួយនឹង​ជីដូន​របស់​លោក​វិញ។ លោក​សង្ឃឹមថា​កាលដែល​បាន​មក​រស់​នៅ​ភ្នំពេញ​ធ្វើ​ឲ្យ​ជីវិត​របស់​លោក​មាន​កា ​រ​ប្រែប្រួល​តែ​មិន​សម​តាម​បំណង​នោះ​ទេ​ព្រោះ​រស់នៅ​ភ្នំពេញ​លោក​ត្រូវ​ជួយ ​ការងារ​ក្នុង​គ្រួសារ​ជាពិសេស​នោះ​ដោយសារ​ឪពុក​លោក​រកស៊ី​លក់​ទឹក​ហើយ​ កាលនោះ​ទិញ​ទឹក​ពី​ម្តុំ​ជិត​ពេទ្យ​កាល់​ម៉ែត្រ​រួចហើយ​យក​មក​ស្តុក​ទុក​នៅ​ ពោធិ៍​ចិនតុង​ដែល​ជា​ទីលំនៅ​របស់​លោក។
ដោយសារតែ ​លោក​ជា​ក្មេង​ពេញកម្លាំង​ស្រាប់​ហេតុនេះ​លោក​ត្រូវ​ជួយ​ការ​រងា​រទាំង​លក់​ ទាំង​អូស​ទឹក​ជូន​ភ្ញៀវ​ថែម​ទៀត​ផង។ រស់នៅ​ជាមួយ​ឪពុក​និង​ម្តាយចុង​អស់​រយៈពេល​២​ឆ្នាំ​រឿង​ដែល​លោក​មិនអាច​ចៀស​ រួច​បាន​នោះ​គឺ​ពាក្យសំដី​របស់​គាត់​ធ្វើ​ឲ្យ​លោក​ពុំ​អាច​ទទួល​យក​បាន​រហូត ​ដល់​លោក​មិនអាច​រស់នៅ​ជាមួយនឹង​គាត់​ហើយក៏​សម្រេចចិត្ត​ចាកចេញ​ព្រោះ​លោក​គិតថា​ហា​ក៏​ស្លាក់​ខ្ជាក់​ក៏​ស្លែង​លោក​មិន​ចង់​ឲ្យ​ឪពុក​លោក​មាន​អម្រែក​ដោយសារ​លោក​នោះ​ទេ។
ចៃដន្យ​ថ្ងៃ​នោះ​លោកពូ​បង្កើត​ខ្ញុំ​ក៏បាន​មកលេង​ជីដូន​ខ្ញុំ​ដែល​ត្រូវជា​ ម្តាយ​បង្កើត​របស់​គាត់​ឃើញ​សភាព​ខ្ញុំ​បែបនេះ​លោកពូ​ក៏បាន​ហៅ​ខ្ញុំ​ឲ្យ​មក ​រស់នៅ​ជាមួយ​គាត់​នៅ​ឯ​ភ្នំពេញ​ម្តុំ​សន្ធរ​មុខ​ព្រោះ​វា​ងាយស្រួល​នឹង​ ធ្វើ​ដំណើរ​ទៅ​រៀន​និង​ជួយ​មើល​ប្អូន​ផង​ដែរ។ ពេលនោះ​ជីវិត​ខ្ញុំ​ក៏បាន​ផ្ញើខ្លួន​លើ​ទ្រនំ​ថ្មី​មួយ​ទៀតហើយ​ខ្ញុំ​ខិតខំ​ ធ្វើ​ការងារ​ផ្ទះ​គ្រប់សព្វ​បែបយ៉ាង​ដើម្បី​ចៀស​ឲ្យ​ផុត​ពី​ក្តី​លំបាក​ វេទនា​ខាង​ផ្លូវចិត្ត​ដែល​ខ្ញុំ​ធ្លាប់​ជួប​”​។
ដល់ពេល ​លោក​បញ្ចប់​ការសិក្សា​មធ្យមសិក្សា​ទុតិយភូមិ​ក្នុង​ឆ្នាំ​១៩៩៦​លោក​ក៏បាន​ ជាប់​អាហារូបករណ៍​រៀន​ខាង​ផ្នែក​មេព្រៃ​នៅ​សាល​វិទ្យាល័យ​កសិកម្ម​ព្រែក​លាភ ​រៀន​បាន​រយៈពេល​២​ឆ្នាំ។ ជា​ភ័ព្វសំណាង​ដោយសារ​បាន​ពូ​ថ្លៃ​អាណិត​ទើប​ណែនាំ​ឲ្យ​ស្គាល់​លោក​យូរ​អាង​ ដែល​ជា​នាយក​សាលារៀន​Cabs(​អតីត​នៅ​ជិត​សាលា​ACE)​រួច​លោក​ក៏​ត្រូវ​បាន​គេ​ហៅ​ឲ្យ​ធ្វើតេស្ត​TOEFL​ហើយ ​បាន​ក៏បាន​ធ្វើជា​គ្រូបង្រៀន​ភាសា​អង់គ្លេស​ប៉ុន្តែ​ដោយសារតែ​លោក​ធ្លាប់​ ឆ្លងកាត់​វគ្គ​គណនេយ្យ​ទើប​មានឱកាស​ធ្វើការ​ងារ​ខាង​ផ្នែក​គណនេយ្យ​ថែមទៀត។ ធ្វើ​បាន​ជិត​២​ឆ្នាំ​លោកនាយក​យូរ​អាង​ត្រូវ​ទៅ​បន្ត​ការសិក្សា​នៅ​ សហរដ្ឋអាមេរិក​រួច​ក៏​សេង​សាលា​Cabs​ឲ្យ ​គេ​ហើយ​លោក​ឃឹម​ផុន​សម្រេច​ចិត្ត​ថា ដាក់ពាក្យ​ឈប់​ធ្វើការ​មុន​ពេល​លោក​ដាក់ពាក្យ​ឈប់​លោក​បាន​រៀប​អាពាហ៍ពិពាហ៍ ​ក្នុង​ឆ្នាំ​១៩៩៩​រួច​មក​ហើយ។
ក្រោយ ​មក​លោក​ក៏​ត្រូវ​បាន​មិត្ត​ភ័ក្តិ​នាំចូល​ធ្វើការ​នៅ​សាលារៀន​ញូ​តុ​ន​ធីឡាយ​ដោយ​ធ្វើជា​គ្រូបង្រៀន​ភាសា​អង់គ្លេស​ហើយ​កាន់​ការងារ​គណនេយ្យ​ថែម​ទៀត​ផង។ ការងារ​ចេះ​តែ​មាន​ភាព​រីកចម្រើន​លោក​ក៏​ត្រូវ​បាន​តែងតាំង​ជា​ប្រធាន​ គណនេយ្យ​រួច​ក៏​ទទួល​បាន​តំណែង​ជា​នាយករង​សាលារៀន​ញូ​តុ​ន​ធីឡាយ​និង​បន្ត​ មក​ទៀត​បាន​ក្លាយជា​នាយក។
លុះដល់​ឆ្នាំ​២០០៩​សាលារៀន​សុវណ្ណ​ភូមិ​ត្រូវ​បាន​បើក​ដំណើរការ​ហើយ​លោក​ត្រូវ​បាន​តែងតាំង​ជា​នាយក​គ្រប់គ្រង​នៅ​សាលារៀន​នេះ។
មកដល់ ​ឆ្នាំ​២០១១​លោក​ក៏បាន​ឡើង​កាន់​តំណែង​ជា​ប្រធាន​នាយក​ប្រតិបត្តិ​អ៊ី​ន​ធី​ ស៊ី​គ្រុប​ដែល​មាន​សាលារៀន​សុវណ្ណ​ភូមិ​សាលារៀន​ប្រ៊ី​ជ​តុ​ន​និង​សាលារៀន​ ញូ​តុ​ន​ធីឡាយ​សរុប​មាន​៣៨​សាខា​នៅ​ទូទាំង​ប្រទេស។
លោក ​បាន​បន្ត​ថា​៖”​ខ្ញុំ​មាន​សេចក្តី​សោមនស្ស​ជា​អនេកប្បការ​ព្រោះ​ខ្ញុំ​ មានឱកាស​បាន​មក​ដល់​ថ្ងៃនេះ​គឺ​ទទួល​បានការ​ជ្រោមជ្រែង​និង​ការ​ផ្តល់​ឱកាស​ ពី​សំណាក់​រៀមច្បង​ដែល​មាន​បទពិសោធន៍​ជាច្រើន។ សំខាន់​យើង​មាន​សមត្ថភាព​ហើយ​ទាមទារ​ឲ្យ​មានឱកាស​ថែមទៀត​ទើប​អាច​ដំណើរ​ការ​ បាន​យ៉ាង​រលូន​ភាព​ជោគជ័យ​ក្នុង​ការងារ​បើសិនជា​គ្មាន​ឱកាស​ទេ​នោះ​នឹង​ មិនអាច​បញ្ចេញស្នាដៃ​ឲ្យ​អ្នកដទៃ​ឃើញ​បានទេ។ មិនតែប៉ុណ្ណោះ​នៅក្នុង​វិស័យ​ការងារ​យើង​ត្រូវ​មាន​ទឹកចិត្ត​ស្មោះត្រង់​មិន ​វៀចវេរ​ត្រូវ​មាន​ភក្ដីភាព​ចំពោះ​មនុស្ស​ដែល​រស់នៅ​និង​ធ្វើការ​ជាមួយ។ មួយវិញទៀត​ចូល​កុំ​ប្រកាន់​ការងារ​ព្រោះ​កាលណា​បើ​យើង​គិត​បែបនេះ​យើង​នឹង​ មិន​មានឱកាស​បាន​ការងារ​ធ្វើ​ឡើយ​យើង​គួរតែ​បង្វែរ​ការ​គិត​បែប​វិជ្ជមាន​ ដោយ​ចាត់ទុកថា​ការងារ​កំប៉ិកកំប៉ុក​នោះ​ជា​ទុន​ដើម្បី​ឲ្យ​យើង​អាច​ឈោង​ ចាប់បាន​ការងារ​ខ្ពស់ៗ​ទៅ​ថ្ងៃ​អនាគត​បាន៕
ឈុន​ហាក់

15th Wedding Anniversary, Nov 9, 2013



First, I want to thank all of you so much for coming. I can't begin to describe how much it means to my wife and me that you are here with us to celebrate our 15th wedding anniversary.




ពិធីបើកបវេសនកាលឆ្នាំសិក្សាថ្មី២០១៣-២០១៤ នៅសាលារៀនប្រ៊ីជតុន​​ ទីតាំងស្ទឹងមានជ័យ ថ្ងៃទី១៣ ខែកញ្ញា ឆ្នាំ២០១៣



សុន្ទរកថា
លោក ឃឹម ផុន ប្រធាននាយកប្រតិបត្តិ នៃអ៊ិនធីស៊ីគ្រុប
ក្នុងពិធីបើកបវេសនកាលឆ្នាំសិក្សាថ្មី២០១៣-២០១៤ នៅសាលារៀនប្រ៊ីជតុន​​
ទីតាំងស្ទឹងមានជ័យ ថ្ងៃទី១៣ ខែកញ្ញា ឆ្នាំ២០១៣

សូមគោរព!
- ឯកឧត្តម លោកជំទាវ លោក-លោកស្រីដែលជាមាតាបិតាសិស្ស
- ថ្នាក់ដឹកនាំគ្រប់សេវាកម្មអប់រំរបស់ អ៊ិន ធី ស៊ី គ្រុប
- គណគ្រប់គ្រងសាលារៀនប្រ៊ីជតុន លោកគ្រូ-អ្នកគ្រូ បុគ្គលិកគ្រប់ផ្នែក
- ព្រមទាំងប្អូនៗក្មួយៗសិស្សានុសិស្សទាំងអស់ ជាទីស្រលាញ់រាប់អាន។

ស្ថិតនៅក្នុងបរិយាកាសសោមនស្សរីករាយ​​​ ក្នុងពិធីបើកបវេសនកាលឆ្នាំសិក្សាថ្មី២០១៣ -២០១៤ នៅសាលារៀនប្រ៊ីជតុន ទីតាំងស្ទឹងមានជ័យនាឪកាសនេះ តំាងនាមគណគ្រប់គ្រង សាលារៀនប្រ៊ីជតុននិងខ្លួនខ្ញុំផ្ទាល់ មានមោទនភាពយ៉ាងខ្លាំងដោយឃើញវត្តមានរបស់ឯកឧត្តម លោកជំទាវ លោក-លោកស្រី ដែលជាមាតាបិតាសិស្ស ព្រមទាំងប្អូនៗក្មួយៗសិស្សានុសិស្ស ទាំងដែលបានចំណាយពេលវេលាដ៏មានតំលៃអញ្ជើញចូលរួមក្នុងពិធីនេះ។
          វត្តមានរបស់ឯកឧត្តម លោកជំទាវ លោក-លោកស្រីនាពេលនេះបានបង្ហាញអោយឃើញ​ នូវការយកចិត្តទុកដាក់ទៅលើការអប់រំដល់បុត្រធីតារបស់លោក-អ្នក ដែលមានសាលារៀន ប្រ៊ីជតុន បានដើរតួនាទីយ៉ាងសំខាន់ ក្នុងការរួមចំណែកបណ្តុះបណ្តាលធនធានមនុស្ស​នៅកម្ពុជា ក្រោមកិច្ចសហប្រតិបត្តិការជាមួយក្រសួងអប់រំយុវជននិងកីឡា។
          ការងារអប់រំគឺការងារសំរាប់យើងទាំងអស់គ្នា​ ថ្វីបើមានសាលារៀនប្រ៊ីជតុនមានតួនាទី​សំខាន់ក្នុងការបណ្តុះបណ្តាលធនធានមនុស្ស ប៉ុន្តែទាមទារអោយមានការចូលរួម ការទំនាក់ទំនងល្អ និងការសហការណ៏គ្នាយ៉ាងស្អិតរមួតរវាងសាលារៀន មាតាបិតាសិស្ស និងសហគមន៏ទាំងមូល ទើបធានាបាននូវគុណភាពនៃការអប់រំមួយដ៏ប្រសើរ។ ​ជាក់ស្តែងការជួបជុំគ្នាថ្ងៃនេះគឺការពង្រឹងនូវទំនាក់ទំនងល្អរវាងសាលារៀនជាមួយមាតាបិតាសិស្សសំរាប់ឆ្នាំសិក្សាថ្មី២០១៣-២០១៤ក្នុងគោលបំណង ធ្វើយ៉ាងណាដើម្បីអោយការសិក្សារបស់សិស្សមានការរីកចំរើនពីមួយឆ្នាំទៅមួយឆ្នាំ។
ឯកឧត្តម លោកជំទាវ​ លោក​​​ លោកស្រី និងភ្ញៀវកិត្តិយសទាំងអស់!
          មកទល់នឹងពេលនេះ សាលារៀនប្រ៊ីជតុន មានអាយុកាលជាង៦ឆ្នាំមកហើយ ក្នុងការរួមចំណែកអភិវឌ្ឍន៏ធនធានមនុស្សនៅកម្ពុជា​ ដោយមានទីតាំងចំនួន៤នៅក្នុង រាជធានីភ្នំពេញគឺនៅទួលទំពូង បឹងត្របែក ដេអិន និងស្ទឹងមានជ័យ​​ ហើយបានប្រមូល សិស្សអោយចូលសិក្សាសរុបជាង​៥ពាន់នាក់ និងបុគ្គលិកសរុបជាង២០០នាក់។​ ចក្ខុវិស័យរបស់សាលារៀនប្រ៊ីជតុនគឺផ្តល់នូវការអប់រំប្រកបដោយគុណភាព ជូនដល់សិស្សា​នុសិស្សគ្រប់មជ្ឈដ្ឋាន ផែ្នកចំណេះទូទៅខ្មែរចាប់ពីកំរិតមត្តេយ្យដល់ថ្នាក់ទី១២ និងភាសាអង់គ្លេស ទូទៅចាប់ពីមត្តេយ្យដល់មធ្យមសិក្សា។​
          ជាទីបញ្ចប់ ក្នុងនាមអ៊ិនធីស៊ីគ្រុប ខ្ញុំសូមសំដែងនូវការកោតសរសើរ និងចូលរួម អបអរសារទរក្នុងឪកាសបើកបវេសនកាលឆ្នាំសិក្សាថ្មី២០១៣-២០១៤នាពេលនេះ។ ជួសមុខអោយគណៈគ្រប់ គ្រងសាលារៀនប្រ៊ីជតុន សូមថ្លែងអំណរគុណចំពោះវត្តមានឯកឧត្តម លោកជំទាវ លោក-លោកស្រីដែលជាមាតាបិតាសិស្ស និងសូមប្រសិទ្ធិពរជ័យជូនចំពោះឯកឧត្តម លោកជំទាវ លោក-លោកថ្នាក់ដឹកនាំ លោកគ្រូ-អ្នកគ្រូ និងបុគ្គលិកគ្រប់ផ្នែកទាំងអស់ ជួបប្រទៈតែសេចក្តីសុខ និងទទួលបានជ័យជំនៈគ្រប់ភារកិច្ច​ និងសូមជូនពរ អោយប្អូនៗក្មួយៗសិស្សានុសិស្សទាំងអស់ ទទួលបានជោគ ជ័យ​ក្នុងការសិក្សាឆ្នាំថ្មីនេះ៕
សូមអរគុណ!
         


ពិធីបើកបវេសនកាលឆ្នាំសិក្សាថ្មី២០១៣-២០១៤ នៅសាលារៀនសុវណ្ណភូមិ​​ ទីតាំងក្រុងតាខ្មៅខេត្តកណ្តាល ថ្ងៃទី២ ខែកញ្ញា ឆ្នាំ២០១៣



សុន្ទរកថា
លោក ឃឹម ផុន ប្រធាននាយកប្រតិបត្តិ នៃអ៊ិនធីស៊ីគ្រុប
ក្នុងពិធីបើកបវេសនកាលឆ្នាំសិក្សាថ្មី២០១៣-២០១៤ នៅសាលារៀនសុវណ្ណភូមិ​​
ទីតាំងក្រុងតាខ្មៅខេត្តកណ្តាល ថ្ងៃទី២ ខែកញ្ញា ឆ្នាំ២០១៣

សូមគោរព!
- ឯកឧត្តម លោកជំទាវ លោក-លោកស្រីដែលជាមាតាបិតាសិស្ស
- ថ្នាក់ដឹកនាំគ្រប់សេវាកម្មអប់រំរបស់ អ៊ិន ធី ស៊ី គ្រុប
- គណគ្រប់គ្រងសាលារៀនសុវណ្ណភូមិ លោកគ្រូ-អ្នកគ្រូ បុគ្គលិកគ្រប់ផ្នែក
- ព្រមទាំងប្អូនៗសិស្សានុសិស្សទាំងអស់ ជាទីស្រលាញ់រាប់អាន។
           
ថ្ងៃនេះខ្ញុំមានសេចក្តីសោមនស្សរីករាយ ដែលបានអញ្ជើញចូលរួមក្នុងពិធីបើកបវេសនកាលឆ្នាំសិក្សាថ្មី២០១៣-២០១៤ ជាមួយឯកឧត្តម លោកជំទាវ លោក-លោកស្រីដែលជាមាតាបិតានិងអាណាព្យាបាលសិស្សនៅសាលារៀនសុវណ្ណភូមិទីតាំងក្រុងតាខ្មៅ ខេត្តកណ្តាលនាឪកាសនេះ។
          វត្តមានរបស់ឯកឧត្តម លោកជំទាវ លោក-លោកស្រីនាពេលនេះបានបង្ហាញអោយឃើញ​ នូវការយកចិត្តទុកដាក់ទៅលើការអប់រំ ដល់បុត្រធីតារបស់លោក-អ្នក ដែលមានសាលារៀនសុវណ្ណភូមិ បានដើរតួនាទីយ៉ាងសំខាន់ ក្នុងការរួមចំណែកបណ្តុះបណ្តាលធនធានមនុស្ស​ ក្រោមកិច្ចសហប្រតិបត្តិការជាមួយក្រសួងអប់រំយុវជននិងកីឡា សំដៅលុបបំបាត់ភាពមិនចេះអក្សរ និងការកាត់បន្ថយភាពក្រីក្រនៅកម្ពុជា។
          ឆ្លៀតក្នុងឪកាសដ៏មានតំលៃនេះ ‌‌‌ខ្ញុំសូមអនុញ្ញាតបង្ហាញនូវជីវប្រវត្តិរបស់សាលារៀនសុវណ្ណភូមិជូនជ្រាបដូចខាងក្រោមៈ
សាលារៀនសុវណ្ណភូមិគឺជាស្ថាប័នអប់រំមួយ ក្នុងចំណោមស្ថាប័នអប់រំផ្សេងៗទៀតរបស់ អ៊ិន​ ធី ស៊ី គ្រុប ដែលបានបង្កើតឡើងនៅខែកក្កដា ឆ្នាំ២០០៩ ក្នុងគោលបំណងសំខាន់ៗចំនួន៣គឺ³
-រួមចំណែកជាមួយរាជរដ្ឋាភិបាល ក្នុងការអភិវឌ្ឍន៍ធនធានមនុស្ស ក្រោមកិច្ចសហប្រតិបត្តិការជាមួយក្រសួងអប់រំ យុវជន និងកីឡា។
-ចែករំលែកបទពិសោធន៍ និងចំណេះដឹងផ្នែកអប់រំ ជូនប្អូនៗសិស្សានុសិស្សគ្រប់មជ្ឈដ្ឋាន ដែលពួកគាត់ចាំបាច់ត្រូវតែទទួលបាន នូវការអប់រំមួយប្រកបដោយគុណភាពពិតប្រាកដ។
-បង្កើតទីផ្សារការងារបន្ថែម ជូនបុគ្គលិកគ្រូបង្រៀន បុគ្គលិករដ្ឋបាល និងបុគ្គលិកផ្សេងៗទៀត អោយពួកគាត់មានឪកាសការងារ ជាមួយសាលារៀនសុវណ្ណភូមិ។
          ចក្ខុវិស័យរបស់សាលារៀនសុវណ្ណភូមិគឺសំរេចអោយបាន​ គុណភាពនៃការអប់រំមួយដ៏ល្អបំផុត ទាំងផ្នែកចំណេះទូទៅខ្មែរនិងភាសាអង់គ្លេស។ ដើម្បីសំរេចបានចក្ខុវិស័យខាងលើ សាលារៀនសុវណ្ណភូមិ​បានកំណត់នូវបេសកកម្មសំខាន់ៗចំនួន៤ដូចតទៅៈ
-ផ្តល់នូវកម្មវិធីសិក្សាដែលមានគុណភាព ដើម្បីអោយសិស្សមានការអភិវឌ្ឍន៍ផ្នែករាងកាយ បញ្ញា ស្មារតី សីលធម៌ និងវប្បធម៌។
-ផ្តល់ជូននូវគ្រូបង្រៀនដែលមានបទពិសោធន៍ និងជំនាញច្បាស់លាស់ ធ្វើអោយសិស្សមានការរីកចំរើនទៅលើការសិក្សានៅក្នុងថ្នាក់រៀន និងសកម្មភាពផ្សេង។
-ផ្តល់ជូននូវបរិយាកាសល្អក្នុងការសិក្សា សិស្សានុសិស្សទាំងអស់ ត្រូវបានជំរុញ និងលើកទឹកចិត្តនូវរាល់សមិទ្ឋិផល និងស្នាដៃផ្សេងៗដែលពួកគេសំរេចបាន។
-ផ្តល់ជូននូវសំភារៈឧបទ្ទេសគ្រប់គ្រាន់ សំភារៈឧបទ្ទេសទាំងអស់ ត្រូវបានធានាអោយមានទៅតាមកំរិតសិក្សានិមួយៗ ធ្វើយ៉ាងណាដើម្បីអោយការសិក្សារបស់សិស្ស មានភាពរីកចំរើន     ជានិច្ច។
          ការសំរេចបាននូវចក្ខុវិស័យ របស់សាលារៀនសុវណ្ណភូមិ កើតចេញពីការខិតខំប្រឹងប្រែងទាំងកំលាំងកាយ កំលាំងចិត្ត និងកំលាំងប្រាជ្ញា របស់គណៈគ្រប់គ្រងគ្រប់លំដាប់ថ្នាក់ លោកគ្រូ-អ្នកគ្រូ បុគ្គលិកគ្រប់ផ្នែក និងមានការចូលរួមយ៉ាងសកម្មពីសំណាក់មាតាបិតាសិស្ស។
          ជាលទ្ឋផលត្រឹមឆ្នាំ២០១៣នេះ សាលារៀនសុវណ្ណភូមិ បានពង្រីកទីតាំងសរុបចំនួន១៦ទីតាំង ដែលបានចំណាយដើមទុនវិនិយោគផ្ទាល់ខ្លួនជាង​ ១០លាន ដុល្លា ដោយមាន១១ទីតាំងនៅ រាជធានីភ្នំពេញ និង៥ទីតាំងទៀតនៅតាមបណ្តាខេត្តមានដូចជាៈ ខេត្តព្រះសីហនុ ខេត្តបាត់ដំបង ខេត្តបន្ទាយមានជ័យ ក្រុងប៉ោយប៉ែត និងខេត្តសៀមរាប ហើយបានប្រមូលសិស្សអោយចូលសិក្សាមានចំនួនសរុបជាង ៣០,០០០នាក់ ក្នុងចំណោម១៦ទីតាំង និងបុគ្គលិកសរុបជាង១,៥០០នាក់។
          ដោយសារមានការទទួលស្គាល់គុណភាពអប់រំ ផ្នែកចំណេះទូទៅខ្មែរនិងភាសាអង់គ្លេស ពីសំណាក់មាតាបិតាសិស្ស ក៏ដូចជាប្អូនៗសិស្សានុសិស្សគ្រប់មជ្ឈដ្ឋាន គណៈគ្រប់គ្រងសាលាបាននឹងកំពុងសិក្សាទៅលើការពង្រីកទីតាំងថ្មីៗចំនួន៤បន្ថែមទៀត ក្នុងឆ្នាំ២០១៣នេះគឺស្ថិតនៅតំបន់ពោធ៌ចិនតុង ស្ទឹងមានជ័យ ច្បារអំពៅ និងឬស្សីកែវ។
ឯកឧត្តម លោកជំទាវ​ លោក​​​ លោកស្រី និងភ្ញៀវកិត្តិយសទាំងអស់!
            ការពង្រីកវិសាលភាពអប់រំ របស់សាលារៀនសុវណ្ណភូមិ គឺដើម្បីឆ្លើយតបទៅតាមតំរូវការរបស់អ្នកសិក្សា និងដើម្បីផ្សព្វផ្សាយសេវាអប់រំរបស់សាលារៀនសុវណ្ណភូមិ ជូនដល់ប្រជាពល      រដ្ឋគ្រប់មជ្ឈដ្ឋាន ដែលពួកគាត់ចាំបាច់ត្រូវតែទទួលបាននូវការអប់រំមួយប្រកបដោយចំណេះដឹង និងចំណេះធ្វើពិតប្រាកដ។
          តាមរយៈរបាយការណ៍ខាងលើនេះ បានបញ្ជាក់ជូនអង្គពិធីទាំងមូល អោយឃើញនូវការរីក  ចំរើនឥតឈប់ឈររបស់សាលារៀនសុវណ្ណភូមិ ក្នុងរយៈពេលជាង៤ឆ្នាំកន្លងមកនេះ។ សមិទ្ឋិផល ដ៏ត្រចៈត្រចង់នាពេលនេះ គឺជាមោទនភាពរបស់គណៈគ្រប់គ្រងសាលារៀនសុវណ្ណភូមិ លោកគ្រូ-អ្នកគ្រូ បុគ្គលិកគ្រប់ផ្នែកដែលមានលោក ជា ធីឡាយ អគ្គនាយកអ៊ិនធីស៊ីគ្រុប ជាអ្នកដឹកនាំនិងបានផ្តល់នូវអនុសាសន៍ជាច្រើន ក្នុងការរៀបចំផែនការអភិវឌ្ឍន៍សាលារៀនសុវណ្ណភូមិ។
ជាទីបញ្ចប់ ក្នុងនាមអ៊ិនធីស៊ីគ្រុប ខ្ញុំសូមសំដែងនូវការកោតសរសើរ និងចូលរួមអបអរសារទរចំពោះស្នាដៃនិងសមទ្ធិផលដ៏ថ្លៃថ្លានាពេលនេះ។ ជួសមុខអោយគណៈគ្រប់គ្រងសាលារៀនសុវណ្ណភូមិ សូមថ្លែងអំណរគុណចំពោះឯកឧត្តម លោកជំទាវ លោក-លោកស្រីជាមាតាបិតាសិស្ស ដែលបានចំណាយពេលវេលាដ៏មានតំលៃ​ អញ្ជើញចូលរួមក្នុងពិធីបើកបវេសនកាលឆ្នាំសិក្សាថ្មី២០១៣-២០១៤ នៅសាលារៀនសុវណ្ណភូមិទីតាំងក្រុងតាខ្មៅ ខេត្តកណ្តាលនាឪកាសនេះ និងសូមប្រសិទ្ធិពរជ័យជូនចំពោះឯកឧត្តម លោកជំទាវ លោក-លោកស្រីជាមាតាបិតាសិស្ស ថ្នាក់ដឹកនាំ លោកគ្រូ-អ្នកគ្រូ និងបុគ្គលិកគ្រប់ផ្នែកទាំងអស់ ជួបប្រទៈតែសេចក្តីសុខ និងទទួលបានជ័យជំនៈគ្រប់ភារកិច្ច។
សូមអរគុណ!